Andri Snær kallar eftir opinberri afsökunarbeiðni og birtir eigið kort: „Ég gaf þeim einn apaheila“
Andri Snær Magnason útskýrir ummæli sín um „apaheila“ og sakar Viðskiptaráð um að tví- og fjórtelja virkjanakosti á orkukorti sínu. Hann krefst leiðréttingar og opinberrar afsökunarbeiðni. Viðskiptaráð svarar fyrirspurn miðilsins og segir töluna standast.
Tölurnar stangast á og fréttin lætur það ógert að greiða úr því. Andri Snær vísar í 85,2 teravattstundir á korti Viðskiptaráðs, en ráðið segir í svari sínu að „talan upp á 82,5“ standist eftir frádrátt. Mismunurinn er tæpar þrjár teravattstundir. Andri fullyrðir hins vegar að skekkjan nemi tveimur Kárahnjúkavirkjunum. Hér var kjarni deilunnar innan seilingar og hann er sannreynanlegur í gögnum rammaáætlunar. Hvorki var leitað til Orkustofnunar, verkefnisstjórnar rammaáætlunar né óháðs sérfræðings.
Miðillinn á hrós skilið fyrir að leita svara hjá Viðskiptaráði. Svarið fær gott rými og efnislega framsetningu, sem lyftir fréttinni yfir hreina endursögn.
Að öðru leyti byggir fréttin nær alfarið á aðsendri grein Andra á Vísi og færslu hans á X. Löngum köflum úr skoðanagrein er raðað upp sem frétt og gildishlaðið orðfæri hans, „sturluð manía“ og „lukkuriddarar“, ratar í millifyrirsagnir án fjarlægðar. Tafla sem Andri styður mál sitt með er nefnd en lesandinn fær hana ekki og getur því ekki metið hana.
