Sjóva takmarkar verðbreytingar við 2,5%
Fréttin endurvarpar fréttatilkynningu frá Sjóvá nánast óbreyttri, með orðalagi félagsins sjálfs í fyrirsögn, inngangi og lokaorðum. Engin sjálfstæð vinna, ekkert samhengi um fyrri iðgjaldahækkanir og engin rödd utan fyrirtækisins. Lesandinn fær markaðsefni í fréttaformi.
Inngangurinn er ekki frétt heldur áskorun frá Sjóvá: „Sjóvá skorar á viðskiptavini sína og birgja til að leggjast á árarnar.“ Þar er blaðamaðurinn hættur að segja frá og farinn að bera boðskapinn. Sama orðalag birtist óbreytt í lokamálsgreininni, og fyrirsögnin tekur upp tölu félagsins án nokkurs fyrirvara.
Heimildin er nafngreind og sannreynanleg, fréttatilkynning og tilvitnun í Hermann Björnsson forstjóra, og það er í sjálfu sér í lagi. Vandinn er að ekkert kemur til viðbótar. Hversu mikið hafa iðgjöld heimilsbíla hækkað síðustu tvö ár? Er 2,5% raunveruleg tilhliðrun eða innan þess sem vísitalan hefði gefið hvort sem er? Hvað segja Neytendasamtökin, ASÍ eða verðlagseftirlitið? Hvað gera hin tryggingafélögin? Ekkert af þessu var reynt, þótt öll svörin séu í símtalsfjarlægð.
Þá er fullyrðingin um að ökutækjatryggingar séu „ríflega helmingur“ af tryggingakostnaði heimila borin fram sem staðreynd, en hún kemur frá félaginu sjálfu og er ekki sannreynd innan fréttarinnar.
Afleiðingin er kynningarefni sem birtist undir ritstjórnarmerki miðilsins.
