Syrgjandi foreldrar Hönnuh þakklát Íslandi
Ítarlegt viðtal við foreldra írskrar stúlku sem lést ásamt tveimur íslenskum ungmennum í bílslysi á Krýsuvíkurvegi. Foreldrarnir lýsa lífi dóttur sinnar, sorginni, aðstoð forseta Íslands og þeirri skoðun sinni að ofsaakstur hafi valdið slysinu.
Í inngangi fullyrðir blaðamaðurinn sjálfur að „vísbendingar“ séu um ekið hafi verið á yfir 200 kílómetra hraða, án þess að segja hvaðan þær vísbendingar koma. Talan verður síðan burðarás í frásögninni og grunnurinn að ásökun á hendur nafngreindum, látnum ökumanni, á meðan lögreglurannsókn stendur enn yfir. Fyrirvarinn um að málið sé í rannsókn er virðingarverður, en hann kemur seint og nær ekki til inngangsins.
Sem viðtal og mannlýsing er greinin vel unnin. Blaðamaðurinn fór á heimili fjölskyldunnar, sviðsmyndirnar eru lifandi og frásögnin er nærgætin. Slík grein þarf ekki gagnrödd um líf Hönnuh eða sorg foreldranna.
Öðru máli gegnir um fullyrðingar sem snerta aðra. Gefið er í skyn að skömm valdi því að foreldrar ökumannsins hafi ekki haft samband, en ekkert bendir til að leitað hafi verið til þeirra. Hlutur forsetaembættisins í því að flýta málum er heldur ekki borinn undir embættið, þótt einfalt hefði verið að spyrja. Lögreglan er ekki heldur spurð um hraðann.
